अनुमति बिना कैलालीको जंगलमा बसेका विदेशी नागरिकलाई २४ घण्टाभित्र खाली गर्न आदेश

८ चैत्र कैलाली/कैलालीको घोडाघोडी नगरपालिका–९ स्थित सिमली जंगलमा अनुमति बिना बसेका एक सयभन्दा बढी विदेशी नागरिकलाई प्रशासनले २४ घण्टाभित्र क्षेत्र खाली गर्न आदेश दिएको छ । भारत, अमेरिका, चीनलगायत विभिन्न देशका नागरिक ’रेन्बो फेमिली ग्यादरिङ’ नामक समूहको रूपमा करीब एक साता अघि देखि उक्त जंगल क्षेत्रमा पुगेका थिए । सरकारी निकायबाट कुनै स्वीकृति नलिई वन क्षेत्रमा अस्वाभाविक गतिविधि गरिरहेको गुनासो आएपछि प्रशासनले उनीहरूलाई सो क्षेत्र खाली गर्न निर्देशन दिएको हो ।
बिहीबार प्रमुख जिल्ला अधिकारी गोगनबहादुर हमालसहित सुरक्षा निकायले विदेशी बसेको स्थानको अवलोकन गरेको थियो।अनुगमनका क्रममा विदेशी नागरिकहरूले आफूहरू ’नेचर लभर’ अर्थात प्रकृतिमा रमाउने व्यक्ति भएको दाबी गरेका थिए । तर अनुमति बिना वन क्षेत्रमा बस्नु कानुनी रूपमा गलत भएकाले प्रशासनले आवश्यक कदम चालेको हो । सोही विषयमा खबर संकलन गर्ने पत्रकार प्रकाश मिश्रमाथि आक्रमण समेत भएको थियो । घोडाघोडी –१० पहलमानपुरको सृजना होटेलका सञ्चालक ४० वर्षीय चेतबहादुर सिंह र सोही नगरपालिका–१ को अजुवा क्याफेका सञ्चालक ४८ वर्षीय डबलबहादुर शाहले पत्रकार मिश्रमाथि आक्रमण गरेका हुन । पत्रकारको उजुरीपछि डबलबहादुर शाहलाई इलाका प्रहरी कार्यालय, सुखडले नियन्त्रणमा लिएको छ ।