भारतीय सुरक्षाकर्मीको कारबाहीमा २२ नक्सलवादी विद्रोही मारिए

प्रहरी महानिरिक्षक बस्तर पी सुन्दरराजले बिजयपुर-दन्तेवाडा सीमाक्षेत्रको जंगलमा १८ जना मारिएको बताए । उनका अनुसार भिडन्तमा बिजापुर जिल्लाको रिजर्भ गार्डका एक जना मारिएका छन् । त्यस्तै, कान्केर र नारायणपुरको सीमाक्षेत्रको भिडन्तमा ४ नक्सलबादीको ज्यान गएको हो । कारबाहीमा सुरक्षाकर्मीले केही स्वचालित हतियार तथा गोलाबारुद बरामद गरेको सुन्दरराजले बताए । छत्तीसगढ राज्यमा दिनभरि चलेको दुई छुट्टाछुट्टै झडपमा एक भारतीय अर्धसैनिक सुरक्षा अधिकारीको पनि मृत्यु भएको प्रहरीले जनाएको छ ।

भारतीय जनता पार्टीका नेता तथा केन्द्रीय गृहमन्त्री अमित शाहले सामाजिक सञ्जाल एक्समा ‘हाम्रो सुरक्षा बलले गरेका दुई छुट्टाछुट्टै कारबाहीमा २२ नक्सलवादी मारिएको’ जनाएका छन् । ‘मोदी सरकार नक्सलवादीविरुद्ध निर्मम दृष्टिकोणका साथ अगाडि बढिरहेको छ । र, आत्मसमर्पण नगर्ने नक्सलवादीविरुद्ध शून्य सहनशीलता नीति अपनाइरहेको छ,’ शाहले लेखेका छन् ।

शाहले भारत सरकारले अर्को वर्षको मार्चको अन्त्यसम्ममा विद्रोहको अवशेषलाई ध्वस्त पार्ने प्रतिबद्धता व्यक्त गर्दै आउनुभएको छ । सन् १९६७ मा चिनियाँ क्रान्तिकारी नेता माओत्सेतुङबाट प्रेरित सशस्त्र अभियान सुरु भएको क्षेत्रमा नक्सलवादी भनेर चिनिने विद्रोहीहरू लामो समयदेखि निरन्तर लड्दै आएका छन् ।

माओवादीले स्थानीय बासिन्दाका लागि जमिन, रोजगारी र यस क्षेत्रको अथाह प्राकृतिक स्रोतको हिस्सा माग्दै आएको छ । भारतको पूर्व र दक्षिणका धेरै दुर्गम समुदायहरूमा प्रवेश गरको उक्त आन्दोलनले सन् २००० सम्म शक्ति र संख्यामा उल्लेखनीय वृद्धि गरेको थियो । तर पछिल्ला दुई दशकयता यो आन्दोलन कमजोर देखिएको छ । सन् २००० पछि भारत सरकारले ‘रेड करिडोर’नामाकरण गरेको उक्त क्षेत्रमा दशौँ हजार सैनिक तैनाथ गरेको छ ।