०८ चैत २०८१ काठमाडौँ/वैदेशिक रोजगारीमा गएका पुरुषहरूले गहना बनाएर २५ ग्रामसम्म सुन ल्याउँदा भन्सार शुल्क लाग्दैन । महिलाले चाहिँ ५० ग्राम सुनको गहना ल्याउँदा भन्सार नतिरेरै लैजान पाउँछन् । त्रिभुवन विमानस्थल भन्सार कार्यालयले गहनाको पनि ‘वर्गीकरण’ गरेको छ । सुनको सिक्री, बेरुवा र बाला गहनामा पर्दैन । जर्ती राखेर आकार परिवर्तन गरिएको सुनलाई मात्र गहना मानिने त्रिभुवन विमानस्थल भन्सार कार्यालयका उपसचिव शान्तिराम निरौलाले रातोपाटीलाई बताए । अर्थ मन्त्रालयले जारी गरेको ‘निजी गुन्टा, झिटी भारी सम्बन्धी आदेश अनुसार १ सय ग्रामसम्म सुन भन्सार तिरेर ल्याउन पाइन्छ । गहना र भन्सार तिरेर दैनिक १ किलो सुन त्रिभुवन विमानस्थलबाट आउने गरेको विमानस्थल भन्सार कार्यालयका उपसचिव निरौलाले बताए । उनले भने, ‘विदेशबाट फर्किनेहरूले भन्सार शुल्क तिरेर दैनिक १ किलो सुन लैजान्छन् ।’
२०८१ साउनदेखि माघ मसान्तसम्मको ७ महिनाको अवधिमा स्वदेश फर्किनेहरूले प्रक्रिया पूरा गरेर १६३ किलो ९७८ ग्राम सुन ल्याएका छन् । यस्तै राष्ट्रबैंकको अनुमतिमा बैंकहरुले कोटा प्रणालीमा सुन आयात गर्न सक्ने कानुनी व्यवस्था छ । जसअनुसार २०८१ साउन भन्दा पछि बैंकहरुले १ हजार ८८ किलो २५ ग्राम सुन आयात गरेको पाइएको छ । विमानस्थल भन्सारको रेकर्ड अनुसार पछिल्लो ७ महिनामा १ हजार ८८ किलो २५ ग्राम अर्थात् बैंकहरुले १० लाख ८८ हजार २५ ग्राम सुन आयात गरेका हुन् । वैध ढङ्गबाट सर्वसाधारणमार्फत १६३ किलो सुन भित्रिएपनि अवैध ढङ्गबाट समेत सुन ल्याउने प्रयास हुँदै आएका छन् । त्यस्ता अवैध सुन विमानस्थलबाट पटक पटक बरामद हुँदै आएका छन् ।
