स्टारमय हुन पुग्यो कृषाको ‘पिताम्बर’

अभिनेता दायाहाङ राईको पछिल्लो समय बक्स अफिसमा दबदबा छ । थियटर ब्याकग्राउन्डका उनको वर्षमै ९ देखि १० फिल्म रिलिज हुन्छन् । अभिनेता सौगात मल्लको कुरा पनि त्यस्तै छ । थियटर ब्याकग्राउन्डकै उनले पनि वर्षमा ७ देखि ८ वटा फिल्म दिएकै हुन्छन् ।अभिनेता प्रदीप खड्का पछिल्लो समयका स्टार हुन् । उनलाई फिल्म खेलाउन निर्माता निर्देशकको लाइन लाग्छ । उनी छानेर वर्षमा २–३ वटा फिल्म गर्छन् । दयाहाङ, सौगात, प्रदीपका अलवा अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया सबै कलाकार यतिवेला व्यस्त  छन् । यी सबै कलाकारलाई एउटै फिल्ममा समेट्न वरिष्ठदेखि अहिले चलेका निर्देशकसम्मले सकेका छैनन् । तर निर्देशक कृषा चौलागाई त्यसमा सफल देखिएकी छन् । उनले यी सबै कलाकार समेटेर फिल्म तयार नै पारिसकिन् । फिल्म हो ‘पिताम्बर’ । किन मोलिन् उनले यस्तो जोखिम ? फिल्मको कन्टेन्टका न्याय दिन पनि स्टार कलाकार आफूलाई आवश्यक भएको उनी बताउँछिन् ।

‘जुन–जुन कलाकारलाई मैले कथा सुनाएँ । उहाँहरू आफै फिल्मका लागि एक्साइटेट थिएँ’, उनले भनिन्, ‘अहिले कलाकारलाई पनि हामी मासमा जानुपर्छ । हाम्रो फिल्म बिक्नुपर्छ । हामीबिच दोस्ती देखिनुपर्छ भन्ने भएको छ ।’ कलाकारमा कम्फर्ट जोनबाट बाहिरिएर, जोडिएर काम गर्नुपर्छ भन्ने भावना आफूले पाएको उनी सुनाउँछिन् । कलाकारमा पलाएको नयाँ सोचका कारण आफ्नो फिल्म स्टारमय भएको उनको धारणा छ ।