राजावादी प्रदर्शनका कारण ‘अन्जिला’को हल भिजिट रोकियो

१५ चैत्र काठमाडौं राजावादीको प्रदर्शन हिंसात्मक बनेपछि फिल्म ‘अञ्जिला’ले काठमाडौंमा गर्न लागेको ‘हल भिजिट’ रोकिएको छ । फिल्म प्रचारकै लागि महिला राष्ट्रिय फुटबल खेलाडी एन्जिला तुम्बापो सुब्बा शुक्रबार ग्रीसबाट नेपाल आएकी थिइन् ।

आज बिहान मात्र काठमाडौं उत्रिएकी एन्जिलाले ठमेलको छाया, ललितपुरको लाबिम लगायतका हलमा प्रचारप्रसार गर्ने र दर्शक भेट्ने कार्यक्रम थियो । राजावादीको प्रदर्शन हिंसात्मक बनेपछिको घटनाको कारण काठमाडौंको मुख्य क्षेत्रका फिल्म हलमा समेत दर्शकीय उपस्थिती निकै पातलो देखिएको हल संचालकले जनाएका छन् ।

निर्देशक मिलन चाम्सले तीनकुने क्षेत्रमा भएको तनाव र राजनीतिक परिस्थितीलाई हेरेर काठमाडौंमा हुने हल भिजिट स्थगित गरिएको बताए । काठमाडौंको हल भिजिट रोकेर ‘अञ्जिला’ टोली फिल्म प्रचारको लागि पोखरा जाने तयारीमा छ । उनका अनुसार उपत्यकाबाहिरका ७ सहरमा फिल्मको प्रचार तयारी छ ।