१४ चैत, काठमाडौं । काठमाडौं उपत्यकाको नेवार समुदायले संघीयता खारेजी, राजतन्त्र र हिन्दू राष्ट्र पुनस्र्थापनाको माग राखी भएका गतिविधिलाई प्रतिगामी भन्दै त्यस्तो चलखेल स्वीकार्य नहुने स्पष्ट पारेको छ । नेवार समुदायका अगुवाहरूले संघीयता, गणतन्त्र, धर्मनिरपेक्षता, समानुपातिक प्रतिनिधित्व र समावेशी लोकतन्त्रको पक्षमा रहेको पनि स्पष्ट पारेका छन् ।
नेवार समुदायका अगुवाहरूले बिहीबार विज्ञप्ति जारी गर्दै आफूहरू गणतन्त्रको पक्षमा रहेको स्पष्ट पारेका हुन् । उनीहरूले पुरानो सामन्ती राजन्त्रात्मक निरंकुश व्यवस्थाले मुलुकको विविधतालाई मेटाएर नेवाः लगायत अन्य समुदायलाई दमन गरेको स्मरणसमेत गरेका छन् ।
‘नेपाल एक बहुजातीय, बहुभाषिक बहुसांस्कृतिक र बहुधार्मिक मुलुक हो । पुरानो सामन्ती राजतन्त्रात्मक निरंकुश व्यवस्थाले मुलुकको यस विविधतालाई मेटाएर नेवाः लगायत अन्य समुदायलाई भाषिक, सामाजिक, सांस्कृतिक, आर्थिक रुपमा दमन गरेको सर्वविदितै छ,’ विज्ञप्तिमा उनीहरूले भनेका छन्, ‘उक्त व्यवस्थाको विरुद्ध नेवाः लगायत सम्पूर्ण उत्पीडित आदिवासी जनजाति, मधेसी, दलि, महिला समुदायको सहभागितामा २०६२÷०६३ मा भएको दोस्रो जनआन्दोलनले नेपालमा संघीयता, गणतन्त्र, धर्मनिरपेक्षता, समानुपातिक प्रतिनिधित्व र समावेशी लोकतान्त्रिक व्यवस्था बहाली गरेको हो ।’
